في خطوة جديدة بتغير شكل المكالمات، أعلنت تروكولر عن إطلاق خدمة بريد صوتي جديدة ومجانية ومدعومة بالذكاء الاصطناعي لمستخدمي أندرويد، وبدأت التجربة في الهند كمرحلة أولى.
الخدمة الجديدة بتخلي المستخدم يستقبل الرسائل الصوتية بسهولة ومن غير تعقيد، وبدون الاتصال بأرقام أو حفظ أكواد زي البريد الصوتي التقليدي. كل الرسائل بتتسجل وتتحفظ مباشرة على الموبايل، وده بيدي خصوصية وتحكم أكبر.
تروكولر كمان بتقدم ميزة تحويل الرسائل الصوتية لنص مكتوب فورًا بالذكاء الاصطناعي، مع فلترة المكالمات المزعجة وتصنيفها تلقائيًا، وكمان التحكم في سرعة تشغيل الرسائل، وكل ده مجاني بالكامل ومن خلال التطبيق في ثواني.
الخدمة الجديدة بتيجي ضمن خطة تروكولر إنها تخلي المكالمات أبسط وأأمن، وتكمل حربها ضد المكالمات المزعجة ومحاولات الاحتيال، خصوصًا إن المستخدم يقدر يشغل ويسمع الرسائل مباشرة من غير لف ولا دوران.
وقال ريشيت جونجهونوالا، الرئيس التنفيذي لتروكولر، إن البريد الصوتي القديم خلاص بقى من زمن فات، والشركة قررت تعيد تقديمه بشكل يناسب طريقة تواصل الناس دلوقتي، يكون سهل، سريع، ومجاني، ويشتغل من غير تعقيد.
تروكولر النهارده بقى جزء من حياة ملايين المستخدمين حول العالم، بأكتر من 450 مليون مستخدم نشط، وعدد تحميلات عدى مليار مرة، وقدرت تحظر 56 مليار مكالمة مزعجة خلال سنة واحدة بس.
